धनगढी : अत्तरियामा अवरुद्ध पारिएको यातायात खुलेको छ। शनिबार बिहान अत्तरियास्थित पद्मा अस्पतालमा उपचाररत गोदावरी नगरपालिका –३ का ३८ वर्षीय विनोदकुमार बोहराको मृत्यु भएको थियो।
डाक्टरको लापर्बाहीका कारण मृत्यु भएको भन्दै आक्रोशित भएका मृतकका आफन्तले अस्पतालमा ढुंगामुडा प्रहार गरेका थिए भने, अत्तरियाको यातायात पनि अवरुद्ध पारेका थिए। अहिले अवरुद्ध यातायात सञ्चालनमा आइसकेको प्रदेश ट्राफिक प्रहरी कार्यालय अत्तरियाले बताएको छ।
ढुंगामुडा प्रहारबाट अस्पताल बाहिरका सिसा फुटेका छन्। आक्रोशित भिड तितरवितर गर्न प्रहरीले अश्रु ग्यास समेत प्रयोग गरेको थियो। आक्रोशित आफन्त र अस्पतालबीच सहमतिको प्रयास भइरहेको प्रहरीले जनाएको छ।
