बैतडी : सिगास गाउँपालिकामा भेट्टिएको फलाम खानीको उत्खनन सुरु गरिएको छ । सिगास(१ को सुगरखालमा फलाम खानी भेटिएको गाउँपालिका अध्यक्ष हरिसिंह धामीले जानकारी दिए ।
गत चैत ८ बाट फलाम खानीमा उत्खननको काम भइरहेको छ ।
‘उक्त ठाउँमा खानीको सम्भावना देखेर भूगर्भ विभागले अध्ययन गरेको थियो, अध्ययनपश्चात् सो ठाउँमा फलाम खानी रहेको देखिएकोले उत्खनन सुरु गरिएको छ,’ उनले भने । सो फलाम खानीमा सुभम् मिनिरल्स प्राइभेट कम्पनी तथा चीनको संयुक्त साझेदारीमा फलाम उत्खननको काम भइरहेको उनले बताए ।
सुभम् मिनिरल्सले परीक्षणकालमा मात्रै करीब ८० प्रतिशत ढुङ्गामा फलाम भेटिएको बताएको छ । फलाम उत्खननका लागि गाउँपालिकाबाट सिफारिश दिएर काम सुरु भइसकेको हो । ‘चीनका विज्ञ टोली आएपछि खानी उत्खनन थालिएको हो,’ उनले भने ।
फलाम खानीमा फलाम भेटिएको खबर आएको र केही दिनभित्र विद्युत् विस्तारको तयारीसमेत भइरहेको अध्यक्ष धामीले जानकारी दिए । फलाम खानी उत्खननको काम सुरु भएकोले स्थानीयवासीले रोजगारी पाउने अपेक्षा गरिएको छ । उत्खनन स्थलमा ३३ केभी विद्युत् प्रसारण लाइन पुर्याउनेलगायतका काम पनि भइरहेका छन् । यसका साथै सडक स्तरोन्नति पनि गरिने जनाइएको छ । रासस
भट्ट हाल खबरदारी न्युज साप्ताहिक पत्रिकाका सम्पादक हुन् ।
उनले यस अघि हिलटाईम्स, हिमालयटाईम्स र पश्चिम टुडे दैनिकमा काम गरिसकेका छन् भने हाल मध्यान्ह दैनिक र सेभेन स्टार फोर के टिभिमा कार्यरत रहेका छन् ।
बिशेष गरि पर्यटन, सामाजिक कुरुती बिरुद्ध र तथा कृषि सम्बन्धि समाचार लेख्ने गर्छन् ।